ADS
ADS
المشكلة هي مش مشكلة بس محيراني جدا .. انا طالبة في كلية هندسة في 4 سنة وفاضل سنة واتخرج كنت مرتبطه بشاب اكبر مني بسنتين اتقدم لوالدي واحنا لسى في الجامعة فطلب منه يستنى الى التخرج حاليا هو اتخرج والحمدلله طلع مش له جيش وكان بيشتغل واحنا في الجامعه بس مش في مجاله وعنده شقة والحمدلله ظروفه متيسرة من 3 اسابيع هو اتقدم تاني ومعاه والده واهله فطلب منهم والدي مهلة يسأل عليهم فيها وحدد 3 شهور عشان يقول لهم جواب نهائي اه او لا طبعا انا شايفة ان 3 شهور كتير جدا للسؤال عن حد وهو كمان مضايق بس والده ماعترضتش على المدة وده اللي شجع ماما وبابا وطلبو منه مايكونش فيه اي وسائل اتصال بينه وبيني في الفترة ده ووافق احترام لهم يعني
المشكلة بقا ان في الـ 3 شهور دول بابا كان تقريبا بيتواصل معاه بشكل شبه يومي بحجة انه بيسأل عليه وعايز يعرفهم فعلا وماما كانت معترضه على الموضوع ده بحجة انها شايفة اننا لازم نتقل والكلام ده بابا بقى يطلب منه يقضي له مصالح يعني مرة طلب منه يتصرف له في مهندس عشان احنا كنا بنبني ارض وكده ومرة طلب منه يشوف له مكتب تأجير عربيات عشان والدي كان عايز يأجر عربية وهو مش بيرفض طلب لوالدي من باب اكرام ليا وعشان يبين لبابا انه قد المسؤولية وعنده خبرة في حاجات كتير وكده بس انا خايفة الولد يفهم مثلا ان بابا بيستغله وخصوصا انه مش عاجبه موضوع الـ3 شهور ده او يفهم ان بابا ماصدق لقى حد يعتمد عليه ويزهق
ماما دلوقت بتقولي ان شخصيته مش عجباها وانه فاضي مش وراه حاجة وموقف حياته عليا مش معقولة كل مابابا قاله حاجة راح نفذها هي كان نفسها في حد شخصيته جريئة ويقدر يقول لا لأي حد حتى لو بابا احاول افهمها ان هو بيعمل كده عشاني بس لو انتو مش امي وابويا هو مش هيعمل كده تقولي ده شخصيته خايبة وتقعد تقولي هو هيقول علينا ايه بعد كده
انا واثقة فيه وواثقة من حبه ليا وبحبه جدا بس حاسة اني متقطعة بين كلام ماما وتصرفات بابا نفسي يتفقو وخايفة تكون وصلت له صورة مش حلوة عن بيتنا
من كام اسبوع بيسأل بابا تاني انا موقفي ايه بابا قاله لسى الـ 3 شهور ماعدوش وهو حاليا لسى مش مستقر في شغل ثابت في مجاله الهندسي لأن صعب جدا الواحد اول مايتخرج يلاقي شغل ببساطة ويكون راتبه كويس هو بيحاول يدور وبابا وماما مش موافقين على خطوبة او قراية فاتحة غير لما يستقر في شغل تبع مجاله وثابت
وكمان ماما مش موافقة على خطوبة شايفة ان مش لها لزمة وانها ماتنفعهاش لاسباب دينية انا منقبة وهي شايفة انه ماينفعش يشوفني غير مرة وحدة في الخطوبة وبعدها مايشوفنيش تاني خالص غير في كتب الكتاب حتى لو فترة الخطوبة ده استمرت سنة عشان كده عايزة منه يكتب كتاب على طول وانا معترضة طبعا وحاسة اني مشتته جدا جدا جدا بين كلامهم وتصرفاتهم ولو قلت رأي او اقترحت حاجة يبقا انا برخص نفسي ومستعجلة على الفاضي ومش بيسمعوني ولا بيقتنعو
انا متمسكة بيه وعايزاه واستنينا كتير بس خايفة فعلا انه ياخد فكرة مش حلوة عننا وساعتها مش هستحمل على كرامتي مهما كان هيفضلو اهلي وبرضو عذراه عشان هو بيحاول قد مايقدر وبيحبني من غير مايشوفني ومستني عشاني .. معلش اني طولت عليكو بس بجد حيرة رهيبة وتفكير مش بيخلصو
ماتبخلوش عليا برأيكو لو في موقفي هتعملو ايه
ADS